Bilirəm...

Bir gün
məni adamlıqdan çıxaran
bu darıxmağı boğub öldürəcəm.
Polis gəlib çatmamış
qaçıb gedəcəm,
ölümün qapısını döyəcəm:
- Gəldim. Çoxmu darıxmışdın mənimçün?
O da qaşlarını çatıb:
- Sən kimsən ki? – deyəcək,
mən də ölüb yerə girəcəm...
“Ölümə belə lazım deyiləmmiş...” - düşünəcəm.
Onun da ürəyi ağrıyacaq mənə,
boynumu qucaqlayıb könlümü alacaq:
- Heç bir Allah bəndəsi üçün belə
darıxmadım - deyəcək.
Ağlaya-ağlaya sevinəcəm mən də...
...Bilirəm, bu belə olacaq...