Məni itirmək

Məni itirmək çox asan,
yum gözlərini...
artıq yoxam...

Gözüyumulu gəz dünyanı,
məndən başqa hamını gör -
tərs baxanı
salam verəni
yan gəzəni...

hər şeyi gör -
saçım gödək
dilim uzun
üzüm tutqun...

Qapalı gözlərin təəccübdən böyüsün:
“Bəbəklərin deşilib, nədi?
Su saxlamır,
damır, damır...”

Qapalı gözlərin
Kişiliyi Azadlıqdan
böyük görsün!

...Eh, ay dəli,
bilmədin ki,
məni itirmək çox asan...
Aç gözlərini...
Gördün?
Daha yoxam...
Olmayacam...