Alça çiçəklərinə ithaf

Qollarını yana açıb,
üzünü göyə tutub,
dünyanı ciyərlərinə çəkib,
gözlərini bərk-bərk yumub
dayanmısanmı ayaqyalın
alça ağacının altında,
alca ağacı çiçəkləyəndə?
Tökülübmü alça çiçəklərinin
ağappaq ləçəkləri
üzünə,
gözünə,
boynuna,
qoynuna?
Ömründə heç olmasa bircə dəfə
o ləçəklər oxşamayıbsa səni,
gözəllik nədir,
yaşamaq nədir,
həyat nədir,
bilmirsən!